Alarive Lavi

Nan yon koridò oswa yon enpas, nan yon katye popilè, yon fanm mete yon luil ap bouyi nan yon chodyè. L ap pale. Apre 25 lane maryaj, se premye fwa lap pale. Ak tèt li. Ak mari a ki kouche. Ak pitit fi li pou li pa swiv menm desten ak li. Yon fanm ap revizite istwa l’ e li pral poze yon aksyon definitif.Yon tèks feminis nan jan pa l’, ke yon evenman ki te fè eskandal nan ane 1980 yo, enspire otè a. Yon tèks ki melanje yon gwo souf powetik ak yon dimansyon teyatral, ki pa an kontradiksyon ak deskripsyon reyalite opresyon fanm sibi nan sosyete a. Yon liv ki pral fè dat nan istwa literè Ayiti.